富豪坊

營業中

休息中

呢日一行三人黎左九龍城的酒店來個商務午餐，地方非常寬落，午餐時間人流唔算好多，坐得好鬆動。有個menu俾我地簡，食物選擇都幾豐富，點菜唔洗等好耐就有野食，好野。選左幾個點心。先黎個蝦餃，皮薄餡靘唔在講，蝦肉爽身配以有咬口筍絲，合拍非常，也無腥味，非常好; 燒賣豬肉富質感有咬口，啖啖肉，絕非一般酒樓貨色;菠蘿叉燒飽有驚喜，菠蘿皮鬆化，飽身軟、棉，咬一啖，熱辣辣叉燒餡連汁緩緩流出，只嫌餡料甜少少，唔好甘甜就一百分。炸竽角外層唔算好鬆，勉強合格，不過內裡餡料豐富，攞返分。加錢要了白肺湯，呢個湯屋企唔會整，太花功夫。好濃杏汁味，豬肺洗得好乾淨，足料，飲完成個人暖曬之餘，仲覺得好滋潤同養顏。蟲草花蒸雞，起用韓國蟲草花，比平時食開的更大、更肥身，香料也更突出，食落更有咬口; 雞肉滑，富雞味，幾大碟。牛肉餅煲仔飯，一上桌，出事，米飯太濕，只空有煲仔飯之名，無煲仔飯之實。肉餅尚滑身，不會死實，也夾有馬蹄碎，爽脆、軟滑兩相宜。但個飯底真係出曬事。係抵食，不過仲會唔會山長水遠過來食，就未必。