中記

營業中

休息中

喺灣仔返工，日日被迫食貴價午餐，同事介紹去駱克道街市熟食中心，話有一間叫中記嘅熟食檔好唔錯，今日一於試一試佢。餐牌上有好多選擇，叫咗涼瓜斑腩飯加凍檸茶。先講吓食物質素，涼瓜斑腩即時落鑊炒，之後連埋個hin汁一齊淋係白飯上，新鮮滾熱辣，成個碟頭飯望落都好吸引。涼瓜非常之新鮮，食落好爽脆，又唔算好苦。斑腩因為預先炸咗，所以外皮唔脆，魚肉就好似一般嘅冰鮮貨色，冇乜突出。嘢飲方面，揀咗凍檸茶少甜，飲起嚟同出邊嘅茶餐廳貨色差唔多，冇乜特別。令人有驚喜嘅係竟然有例湯送，飲得出應該係冬瓜煲排骨湯，飲起嚟非常之清熱，令人有喜出望外嘅感覺。一碟飯，一杯凍飲，加埋一個例湯，價錢盛惠$35。喺灣仔來講，呢個價錢真係非常之抵食。