龍莊

營業中

休息中

唔係朋友介紹都唔知道原來小朋友學校附近有間中餐廳，今日課外活動完咗我哋1家四口一於去試吓，估唔到有意外驚喜，環境除咗舒服，食物好味，擺盤都好精美，仲有唔少打卡位。一坐低除咗沖茶就會奉上小食，估唔到係我最鍾意嘅醃蕃茄仔，酸酸甜甜好好味，另外只要關注餐廳嘅Fb / IG 就會送每人一客磯煮鮑魚，鮑魚成個蒸籠咁上，聽放上乾冰，打卡一流，唔好諗住免費唔好食，估唔到鮑魚真係非常好食，好彈牙，而且好鮮味。之後再飲過燉湯，大大嚿節瓜配上原粒瑤柱，冇味精好清甜，小朋友最鍾意食香口野，椒鹽鮮魷啱晒佢哋，而我反而好鍾意南乳煎雞，有南乳嘅鹹鹹香香味道，配上外脆內軟嘅雞件，雞皮好脆，但估唔到雞肉仲係好嫩滑。食中菜點都會嗌啲小菜，炒豬頸肉配上蔬菜同肝菌，豬頸肉好爽口唔會好肥膩，全部配料沾滿醬汁，味道真係超級惹味。另外為咗小朋友叫咗一碟蒸豆腐，豆腐上面有帶子，好鮮甜而且豆腐好滑啊，送飯一流，不過我哋就唔係叫白飯，我哋叫咗海皇湯泡飯，泡飯好足料，真係好好味，我覺得我哋叫多咗嘢食，但因為實在太好味，最後哥哥食唔停口，包底食晒所有嘢，真係好犀利，證明真係好好食。