Burgerman (埃華街)

營業中

休息中

大角嘴埃華街絕對算得上係一個雲集各式美食嘅飲食樂園。除咗有已經開店好幾年依然屹立不倒嘅餐廳，亦不乏新派fusion嘅新面孔。無他嘅，除咗附近居民城幫襯外，地鐵站上蓋嘅兩大銀行職員都提供咗一個龐大嘅午餐消費力俾哩一帶嘅餐廳食肆，所以間中唻搵食包有新鮮感。Burgerman已經座落Ivy Street幾年，一直提供高於連鎖店質素嘅漢堡。舖面不大，約十數座數，裝修簡便帶有美國街頭風格。枱面提供餐具、醬汁同膠手套，盡顯細心。餐牌非常清晰，各式漢堡單點或加$20有套餐，combo可選連皮粗薯條、薯格或沙律加罐裝汽水。漢堡種類亦照顧到不吃牛人士，有雞堡、魚堡或菇堡。餐牌主打嘅並唔係最貴嘅鵝肝和牛漢堡，而係「至尊漢堡」。此招牌漢堡有雙層手打牛肉漢堡扒、雙層芝士、煎蛋、脆煙肉、蕃茄、生菜、蘑菇和香炒洋蔥。上枱賣相一流，同旁邊嘅罐裝汽水一比，竟然一樣咁高，其巨型感更加強烈。漢堡肉質嫩滑入味、脂肪比例適中，咬落啖啖肉，有肉汁得唻又唔會太肥膩，唔錯。加埋其他豐富嘅配料，絕對明白店家點解會將至尊漢堡當招牌菜。薯格即叫即炸，唔係預先炸定，所以夠熱夠脆。咬開唔會實登登仲要有少少鬆鬆哋嘅薯仔感覺，正。