豪園麵家

營業中

休息中

呢間餐廳開業已久，由舊時平時新村檔仔搬到而家既大鋪。餐廳主打中式麵如雲吞麵、炸醬撈麵等等。晚間就做小炒，食過好多次味道同鑊氣都唔錯。餐廳比一般茶餐廳乾淨及光猛，鋪面面積大，坐得舒服，而侍應姐姐都十分有禮貌。當日一行二人叫左兩個餸，分別係黑椒薯仔牛柳粒及拔絲欖角骨。我每次黎都會嗌黑椒薯仔牛柳粒，牛柳煎香，薯仔炸香後再落鑊炒勻，汁既調味帶甜咸，後勁有小小黑椒既辣。薯仔炸得熟透外皮香脆食落軟熟唔生，牛柳食到口感、有牛味而無筋，上菜時香噴噴就算送飯定送酒都係一流，唯一可以彈既就係醬汁可以多D，令每粒薯仔都可以包滿醬汁。 食厭左咕嚕肉既朋友可以試下拔絲欖角骨，排骨炸香後以黑醋、欖角既調製成既醬汁炒勻，入口帶甜酸，酸酸甜甜撈飯一流。排骨肥瘦勻稱唔會一舊肥一舊瘦肉，而且軟骨都咬得碎，岩哂鍾意咬軟骨的朋友們。除左以上菜式，我試過其他小炒如煎蓮藕肉餅、炸蠔餅及雞煲等等既菜式味道都唔錯，可以一試。總結黎講餐廳食物質素幾好，環境乾淨，但價錢就相對比其他茶餐廳高小小，不過一分錢一分貨，對自己好D,食落自己肚無所謂啦～