茜廊餐廳 (天盛商場)

營業中

休息中

一行十人走去天水圍茜廊，就係為咗俾小朋友一個生日驚喜。入門嘅大餐檯，自成一角，啱晒家人gathering，感覺好正。餐牌上食物相片好吸引，左睇右睇實在好難揀，因為樣樣都想試。終於叫咗3款小食熱吓身，有焗田螺、串燒沙嗲雞，同埋黑松露薯條，香口夾惹味，唔錯！不過食食吓，我哋發現原來串燒雞嘅沙嗲醬用嚟點薯條，非常正。主菜葡式烤BB豬，我吔要咗2客，嚟到睇到份量咁大都驚消化唔晒，不過呢個擔心係多餘，一入口熱辣辣，皮脆肉嫰，萬分推薦。百里香春雞嘅皮烤得都幾靚，如果鹹味同香料再多啲會更加好食。一米pizza終於出場啦！果然長度十足，好大驚喜。Pizza當蛋糕，九個大人對住一個小朋友唱生日歌，從未試過咁開心。最重要係睇到小朋友歡笑中流露嘅感動眼神. . . . ，$268可以有咁正嘅氣氛，好抵啊！最後，仲叫咗焦蕉布朗尼雪芭+朱古力心太軟，雖然唔係人人鍾意食甜品，不過大家都覺得賣相同味道都有水準。