西貢越南真味 (已結業)

又一間大件夾抵食既越南嘢，地方大又坐得舒服，仲有啲聖誕佈置下幾有氣氛，男朋友叫左個火車頭牛肉鍋粉，一上枱我o左嘴，真係好大碗，有金錢肚、蘿蔔、牛腩等等，非常足料，湯底用牛骨精心淆製而成，所以味道十分濃郁，河粉、金邊粉或者檬粉任君選擇，我就嗌左個香茅雞扒飯，我好中意佢個甜豉油，應該加左少少麻油好香，齋撈飯食都夠味，雞扒大大塊，外皮夠香脆，肉質嫩滑，唔會話因為煎完就乾爭爭，咁大碟都只係59蚊，飽到上心口，仲有小食忌廉蟹肉薯餅，餡料creamy好味，飲品必叫椰青，十分清甜潤喉，男朋友揀既特色越南滴漏咖啡幾得意，同埋佢話好好飲，澀得黎又有奶香，飲落口感好smooth，最正係佢地仲有西式甜品，完全滿足曬我多個願望！朱古力慕絲蛋糕都加18蚊就可以食埋，甜度真係啱啱好，連我男朋友唔中意食甜野都接受到話幾好味，可可粉同慕絲配搭得好，一層一層非常平均👍