老馮茶居 (大棠路)

點心店嚟講，老馮茶居嘅質素相當唔錯。我唔食魚，所以平時好少叫蜆蚧鯪魚球，就算同枱叫咗，我都淨係會揀哂啲蜆蚧食😂，不過今次呢碟外貌炸得香脆，的起心肝一試，肉質彈牙，一啲都唔腥，配埋酒味偏濃嘅蜆蚧醬，高質👍。其他點心質素亦唔錯：片香馬拉糕又軟又香，熱辣辣非常好食😋；沙嗲金錢肚雖然略為偏腍但非常入味；鮮蝦腐皮卷外皮又薄又脆，入面嘅蝦膠厚實彈牙，唔錯。意猶未盡，再叫多個蝦醬蒸腩仔飯，腩仔肥膏唔少😨，雖然好邪惡，但就好好食🤤，同蝦醬可謂絕配；另外，個飯底都值得一讚，唔知係咪因為用砵仔蒸嘅關係，粒粒分明，彈牙好食。最後叫埋甜品薑汁燉鮮奶，呢個就正常水準，薑汁味唔算強，唔係我最鍾意嘅口味。