小曼谷泰國美食 (南角道)

營業中

休息中

去開九龍城梗係要食泰國菜啦！今次同朋友一出宋王臺地鐵站就見到呢一間小曼谷泰國美食，決定同朋友就喺呢度食晚餐！咸肉炒芥蘭，芥蘭好柔嫩，好新鮮！豬肉碎生菜包，有得選擇辣度，我哋揀咗小辣，有辣嘅香味，但又唔會太辣，連唔係好食得辣嘅朋友都覺得食到。泰式鮮蝦金邊粉，份量好多，金邊粉炒得啱啱好，唔會太乾唔會太濕，食落好煙靭，蝦都好大隻好彈牙，配合埋花生更加有口感！泰式拼盤入邊有蝦餅、魚餅、春卷、雞棗點咗細份，每一款會有兩舊，而且會幫你剪開一半，好貼心，方便share食。我覺得樣都好好食，全部都係新鮮炸，好香脆，最喜歡蝦餅，好重蝦味！泰式咖喱法包軟殼蟹，呢個咖喱好香口，配合麵包，麵包吸晒所有咖喱汁，真係一流，軟殼蟹份量好多，而且都炸好脆。而飲品我哋每人點左一杯，而且有得選擇甜度好好！我點咗椰皇沙冰小甜，好大杯，椰皇味好重，本身唔係鍾意飲太甜嘅嘢所以我覺得少甜啱啱好。