Homeland (東昌街) (已結業)

今日又同大囡去拍拖食lunch，比佢獨享一下媽咪同美食。呢間 Homeland 之前經過已經想試，因為佢嘅外牆好靚，打咭一流，今日終於可以嚟試吓！入到去先發現原來呢度有2層，我哋就坐喺上層。Lunch set 都幾多選擇，囡囡係芝士怪，所以揀咗 肉醬芝士四重奏千層面，我就揀咗 西班牙伊比利亞豬肩肉，再加購 柚子蜜雞翼3隻。午餐包咗田園沙律🥗同飲品。田園沙律係用黑醋汁配雜菜粟米同車厘茄，酸酸地都幾開胃，難得囡囡都有食，平日佢唔係太食沙律。西班牙伊比利亞豬肩肉 - 賣相好靚，我有諗過豬肩位置脂肪少啲會唔會韌？！結果係外層燒到脆脆地，好惹味，咬落去好淋，而且幾juicy，好好味😋，囡囡分咗我半件去😆！薯蓉幾滑，唔錯！肉醬芝士四重奏千層面 - 好多芝士，拉哂絲咁😆，肉醬千層麵幾惹味，蕃茄同芝士味都好香濃。加購嘅雞翼有3種口味（明太子、柚子蜜、白松露忌廉）可以揀，本身想揀白松露忌廉，但小朋友鍾意柚子蜜，唯有下次再試啦！幸好柚子蜜雞翼都唔錯，炸得好脆，醃得幾入味，撈埋柚子蜜，甜甜地幾好味。呢度嘅嘢食真係唔錯，下次要再嚟試埋burger！