新竹源越南餐廳

營業中

休息中

每次經過灣仔《新竹源越南餐廳》都見到滿哂座，今日趁weekend唔趕時間就排隊試下啦！一行三人被安排坐卡位，地方闊落，仲要一讚嘅係卡位座位背後係加高咗嘅，唔會見到隔離枱嘅人，私隱度高👍🏻《法式肝醬札肉三文治》一上枱嚇一跳！分量大得驚人！大大件嘅法包烘得香脆，餡料亦好足，肝醬鹹香惹味，札肉係厚切嘅口感紮實，加埋新鮮嘅生菜同番茄，原來成件事係可以咁夾嘅👍🏻《越式拼盤A》有四款越式小食，分別係春卷、煎紮肉、粉卷同豬肉蝦片。春卷大大件炸得香脆又唔會太燶，粉卷餡料好足而且皮薄。豬肉蝦片就係豬扒粒粒加小小米粉鋪係蝦片上面，成個一啖咬落去又幾夾又幾好食喎，蝦片好脆卜卜！最後就係我至愛嘅煎紮肉，仲係黑椒紮肉哦！煎得非常香口又唔會太乾，紮肉裡面嘅黑椒簡直係畫龍點睛！正！《雞絲湯河》又係勁大碗！雞絲係真係原隻雞撕出黎嘅，分量都唔少，湯底清清地，配埋d辣椒同青檸汁成件事都好fresh總結今餐都好滿意！咁嘅價錢分量同味道，係解釋得到點解成日都爆場嘅👍🏻