大將 (已結業)

最近天氣涼返少少，就即刻約朋友去打邊爐，黎到popcorn入面既大將火鍋放題，今次我地叫左澳洲和牛牛小排火鍋放題，認真唔錯。澳洲和牛牛小排火鍋放題 $368我地叫左雞白湯同日高昆布湯，昆布湯清新清甜，雞白湯香濃鮮甜，兩款配肉類都幾適合。揀完湯底之後店員會先送一碟嘗味頭盤，有廣島蠔兩隻，鮑魚，牛舌同牛胸腹。蠔既味道十分鮮而唔腥，鮑魚都好爽口，牛胸腹既油脂分佈得好好。之後重點就緊係要叫佢地既澳洲牛小排黎食啦，佢地既牛小排質素唔錯，有肉味得黎肉質嫩滑，又唔會有日本和牛果種油膩感，食多幾舊都仲得。除左和牛之外佢地仲有好多海鮮可以揀，我地就試左日本帶子，沙白，海蝦同花膠。帶子鮮甜，size都算大粒。沙白漲卜卜得黎無沙，值得一讚。海蝦肉質爽口彈牙，唔會霉哂。出面自助區仲可以各種小食，蔬菜，醬料，飲品同甜品，種類十分豐富，分區都幾清晰。佢地既特別之處係可以有即整窩夫，自己整既果然係好食d。