御泰坊-泰越菜 (已結業)

疫情關係，冇得同屋企人出去食飯慶祝生日，唯有買外賣返屋企一齊食，最近好多外賣都有折，意外發現原來呢間餐廳都係king’s parrot group!而家做緊六折勁優惠，買咗幾個餸返去一齊食。咖喱麵包軟殼蟹- 外賣包得好仔細，三樣嘢仲要係分開上，唔怕麵包同軟殼蟹浸到淋晒。麵包比起堂食較靭，軟殼蟹就保持到香脆，而且份量都唔少！咖喱好香，點麵包真係一流！蒜蓉炒芥蘭- 估唔到普通嘅炒菜菜式係最高評價嘅，每個人夾起都覺得炒得非常之香口，顏色也保持翠綠，食得出芥蘭菜非常新鮮柔嫩，係最快清晒嘅一碟！泰式菠蘿炒飯- 同餐廳比，就係少咗個菠蘿殼，肉鬆、炸腰果、菠蘿粒、肉碎、雜豆，材料十足，外賣都係咁好食！另外仲叫咗軟殼蟹紙米卷同埋炒金邊粉，紙米卷包得好靚，餡料填到脹卜卜，配埋酸甜汁好開胃！生菜肉碎包青檸同香葉味都好突出，個個食到舔舔脷！金邊粉少少酸酸甜甜都唔錯，係凍咗少少有啲黐埋一舊舊，不過呢d一定係現場食最好食！折咗之後咁多樣食物加埋都係三百幾蚊，真心非常抵，希望間餐廳可以捱過呢個疫情！