吞POT 雞煲火鍋.住家菜

營業中

休息中

好耐都冇同老竇食嘢，老竇最鍾意就係打邊爐，又唔鍾意去遠嘅地方，於是就近近地搵左旺角嘅呢間吞pot。去到23樓一開lift就見到佢嗰一缸龍吐珠風水魚，d魚靚之餘缸水又好乾淨，睇黎老細好有心機養魚。坐低嗰陣時都係6點幾左右，見到佢七點半前埋單有半價，於是就問吓個侍應，跟手就即刻幫我地mark低咗可享半價。於是乎我哋就快快手落好單。見到隔離有枱叫咗個牛肉，中間好似有朵花咁，望落又唔會太肥，於是就問下侍應，原來嗰個就係特級美國肥牛。上到枱碟牛又真係唔係好肥，啱晒我哋鍾意食瘦嘅人。而且肉味濃郁，焯佢8至10秒食就最嫩滑可口。美國桶蠔一碟有五隻，全部都大大隻，掌握好時間滾至啱啱熟，咬落去鮮甜得來又多汁，仲一啲都唔腥，連平時唔鍾意食生蠔嘅女朋友都食到唔停到口。佢個爆芝響鈴都幾特別，淥2秒左右拎返上嚟，既脆又軟，中間嘅芝士流心般流出嚟，估唔到嘅係芝士同響鈴都好夾，一d都唔會太溜，我自己一個就食晒三件。蜂巢豆腐索吸左啲湯汁都好好味，再加上皇帝菜好新鮮，三個人食咗兩碟好快就清晒。結果我哋三扒兩撥好快就7點3左右已經食晒，有半價咁抵，下次可以約埋成屋人一齊再食過。