力寶軒

營業中

休息中

好多年前喺金鐘打滾嘅時候，時時去力寶軒飲茶，而家都成日間唔時會想食佢個蘿蔔絲酥餅。今日友人提議去飲茶，所以我就話不如去力寶軒食啦。好彩唔使等位就有得坐低，職員放低咗餐前小食俾我哋之後，我哋點咗五款點心。梅子花生（餐前小食）：花生係煲熟嘅。加上淡淡嘅梅子味，感覺清新。蘿蔔絲酥餅：專程為佢嘅蘿蔔絲酥餅而來。好彩質素依舊。酥皮部份酥脆，蘿蔔絲清甜軟熟juice. 加上芝麻一齊炸，更添香氣。五柳炸雲吞：依家越嚟越少舖頭有炸雲吞賣。大家要好好珍惜。炸雲吞皮脆，內餡嘅蝦新鮮彈牙。記得要點個甜酸汁，可以中和炸物嘅油膩感。叉燒包：好多叉燒粒喺入邊，包皮薄。真係皮薄餡靚。而且包嘅質感鬆軟。陳皮蒸牛肉球：牛肉球質地軟熟。陳皮同芫荽增加味道層次。而馬蹄就令牛肉球軟熟得黎又帶爽口嘅口感。蟹籽蒸燒賣：豬肉同蝦嘅比例好，口感彈牙。味道鮮味。