吉豚屋吉列豬扒專門店

營業中

休息中

前好幾次去執笠倉買嘢，經過一間見到有鰻魚飯食的餐廳，而且價錢唔算貴，次次都想食，但係因為次次都係食完飯想買嘢先經過，所以未有機會食，今次就真係可以專登去食啦。佢係一間日式餐廳，我地個時大約七點左右，好彩仲有位，我同男朋友叫左兩個便當，初時見到有一個69蚊包飲品、湯、白飯的吉烈豬蝦便當，係想叫呢個㗎，但係原來6點前先有，所以無得食，所以我就叫左65蚊的吉烈雞蝦便當同69蚊的鐵板滑蛋鰻魚便當加凍奶茶。首先講下個野菜豚肉湯先，佢係麵鼓湯嚟的，不算係太鹹，但都叫幾入味，入面的野菜有薯仔片、紅蘿蔔片、洋蔥(?)、同豚肉片，啲蔬菜都幾入味，算是不錯。主食方面，先談談吉列雞扒和吉烈蝦定食，炸蝦有兩隻，雞扒一塊，附上沙律醬，不過我個人就覺得比較乾，食兩至三舊已有dry dry地的感覺，我要用鰻魚便當的汁來撈飯，當然可能只係因為我比較鍾意有汁撈飯的緣故啦。至於鰻魚飯，我就覺得啱啱相反，本來預期鐵板上，應該會表面少少脆，入面軟QQ，點知佢係滑蛋加了一些似壽喜燒的汁，令到條鰻魚比較淋身，同埋就唔係用照燒汁，不過雖然同預期不同，個味道都其實係唔差的。