篤篤船麵 (荃灣千色匯) (已結業)

聽聞荃灣千色匯開咗間泰式麵店，趁住放假特地嚟試一下。舖頭主打泰式船麵，除咗大碗嘅船麵，仲可以好似喺泰國咁，揀一碗碗細細碗嘅船麵，放到成枱都係，幾有噱頭。仲可以自由配搭，好似港式車仔麵咁，自己揀麵底、湯底同配料，選擇亦唔少。三併望落料仲多過麵，除咗我揀嘅牛腩、牛肚同豬手之外，仲有大量豆卜同白蘿蔔，算係豐富，但成碗麵其實份量並唔多，湯底不過不失，配料亦唔太入味，特別係白蘿蔔，住得唔夠腍，更莫講話入味。牛腩炆得尚算軟腍，但細細件食得唔過癮。牛肚唔夠入味，中規中矩。豬手係三款配料中最抵食，大大件，而且啖啖肉，炆得唔算好腍，仲有少少咬口，係我鍾意嘅程度，唔錯。朋友點嘅牛魔皇比我嘅再細碗少少，每樣配料一件起兩件止，反而最多係白蘿蔔同豆卜，麵量亦偏少，感覺性價比唔高。椰子水味道一般，雖然標榜係天然純正，但飲落有啲死甜，感覺亦麻麻。餐廳融合咗泰式船麵同港式車仔麵兩大元素，但船麵唔夠正宗，車仔麵嚟講配料亦煮得唔夠入味，而且性價比唔高，仲有好大進步空間，想話食返碗船麵過一過旅行癮就唔好抱太大期望。