八十八居酒屋

營業中

休息中

近排股市牛皮，從事證劵買賣的舊同學壓力好大，我哋約佢食晚等佢可以輕鬆一下，因為知道有間居酒屋叫做八十八，咁好意頭好啱佢。我哋女仔食得要好但唔需要多，飲少少酒可以減壓，所以主要點可以送下酒的新款食品。係台灣食過櫻花蝦，勁鐘意，所以第一款就係佢，炸櫻花蝦，估唔到，細細隻都咁肥，脆卜卜，鹹鹹地，又惹味！呢度學西班牙菜叫tapas，我哋點了三款，優惠價$360。第一款到，松露醬油燒帶子，用紫菜包住食，似食海膽吃法，醬油有鹹香，日式醬點都有啲麵鼓咁，幾有新鮮感，夠香脆。第二款又係包住食的，但唔需要自己包，出現已經包好，芝麻汁燒三文魚壽司生菜包，真係未試過，生菜包魚生吃過，包壽司都唔錯，本來只有軟棉棉口感，現在多了生菜的爽脆。最後係汁燒黑豚架，肉好嫩，汁好味，燒得夠火喉，大件夠食。未夠飽，加幾條串燒，店員特別推介華味鳥，未食過，所以聽佢話。先到的竟然係燒雞尾巴，真抵死，尾都食，又真係好肥，滑溜溜，無筋似食肥豬肉。雞頸肉用豬頸肉差不多，韌靱嫩嫩，有口感，燒得好好。大家傾得好開始，呢度氣氛好，坐得舒服，食物質素幾好，唔算平但都值。