一杯屋 (已結業)

黎銅鑼灣食午餐，行到Sogo附近呢棟澳門逸園大把餐廳，最尾揀左呢度8樓既一杯屋。同同事每人叫左一份定食，另外加$60要左份刺身。午市定食跟既唔係面豉湯，而係韭葱湯，味道帶鹹，無草青味，味道偏向洋蔥。沙律預拌醋，上面有一小塊鴨胸。茶碗蒸入面有帶子、蟹柳等，非常足料架。水份配合精妙，食落唔會太結又唔會散。南瓜一小件，味道係來自南瓜既自然甜。<日式燒安格斯牛扒>（定食 $168）要左五成熟，果然啱啱好，肉質結實，配上調味料燒完之後牛味更出。配飯一流。<炭燒喜之次>（定食 $168）喜之次係日本名魚之一，係啲高價日本料理先見到，呢度$168就食到都幾抵。燒完係脆脆既皮下，魚肉依然嫩滑，感覺幾新鮮，配蘿蔔蓉同燒汁食，味道豐富。<刺身三點>（$60）用左月亮碟上，擺盤一流，分別有三文魚、鯛魚仲有海膽。三文魚厚切，食落夠油潤，好新鮮。鯛魚爽口，點啲啱啱既酸汁啱曬。海膽鮮甜，下面既青瓜都切得好精緻。呢度上菜都算快，啱曬趕番office既打工仔啊。裝修亦好有居酒屋感覺。