今次真係抵到爛，尖沙咀君怡酒店入面間『九十番地』居酒屋，裝修和風，環境都好舒服。佢哋做緊限時優惠，原本$698嘅【極尚套餐】而家$488就食到，可以食120分鐘，好抵食～
我同Friend子試咗個極尚套餐，一上枱就知冇揀錯 —— 個藍鰭吞拿魚刺身沙律新鮮到震，吞拿魚油潤得嚟唔腥，撈埋沙律菜食真係開胃到停唔到口～跟住個魚子醬三文魚子蟹肉三色杯，睇見都流口水，魚子醬鹹香爆漿，蟹肉鮮甜，三種味道撞埋一齊，超正～
5
重頭戲嚟喇，芝士北海燒龍蝦（半隻）焗到金黃色，拉絲芝士鋪滿蝦肉，龍蝦肉彈牙又濃郁！個時令刺身拼盤有五款，件件厚切光澤滿分，尤其帶子鮮甜到似喺海入面撈上嚟咁。
手工串燒六串包括：肉嫩多汁嘅鹽燒雞肉串、脆卜卜但唔油膩嘅雞皮蝦、肥美爽口嘅牛舌芯、鳥取豆腐竹輪、惹味香口嘅五花腩同日式燒雞翼。
鍋物方面，我哋揀咗味噌蠔鍋。啲蠔肉肥嘟嘟滑捋捋，加埋新鮮蔬菜，湯底鮮甜飲到見底！最正係個薩摩A4和牛 同埋 北海道雪夢豚任你追加，啖啖油脂香溶喺口，食到唔願停～
仲有嗰三款可以無限追加嘅手卷：藍鰭吞拿魚腩蓉手卷、海膽右口魚邊手卷、A4薩摩和牛手卷。食到捧住個肚走，仲要係酒店環境咁舒服，今次真係飽到上心口嘅大滿足。
