火鍋煮場 (已結業)

今日來到深水埗呢間火鍋煮場，舖頭細細但係都有個大魚缸裝滿新鮮海鮮。我哋叫咗番茄海鮮煲做湯底，個鍋開始滾已經聞到好香番茄味，好濃郁，之後服務員就拎咗碟海鮮，嘩嘩嘩好豐富，有蟹，蜆，青口，蝦，重要係大隻架，好有誠意！差唔多好似我隻手咁大嘅青口！等湯滾咗就將成碟海鮮倒落去，再冚返蓋滾下佢。等緊湯滾嘅期間，服務員問我哋有無人呢個月生日，咁啱我個朋友就係咁個月生日，原來本月之星可以免費獲得魚生拼盤一碟！好嘢！湯滾啦，試下啖湯先， 好～甜～呀！食物開始嚟啦～打邊爐最鍾意飲竹蔗水，先叫一渣先～三式牛肉拼盤－安格斯牛小排，手切牛頸脊，牛展，好香牛味，脂肪同肉嘅比例剛剛好，一啲都唔韌，入口就有牛油香，有少少入口即溶嘅感覺。酥炸午餐肉，極品呀！！！！真係超正，外脆內軟勁香口，雖然好邪惡，但係我哋好愛呢碟，湯未滾都清咗大半碟啦！（一定要試！）手打丸係火鍋煮場嘅招牌，我哋叫咗手打墨魚丸，蝦丸同鯪魚丸，食落都好彈牙，正！鮮蝦水餃，真係有驚喜，因為每隻水餃都有2隻蝦係入面，真材實料，大大隻蝦大大舊肉！竹笙都係招牌嚟架，好大條，一落落去就會吸晒啲湯，好好食，吸收晒湯嘅精華，濃郁嘅番茄味加上海鮮嘅鮮甜，無得輸啊！！！