潮樂園 (已搬遷) 新店位置

食午飯時，我同大少講我想食滷水鵝，附近有間潮樂園，不如去試下。大少已經提醒我，唔好咁大期望。舖仔細細，只得4個位。 有如一般滷水店，裏面有鵝片，鵝肉，鵝腸等等嘅滷水食物。本來我想食滷水鵝拼鵝肝飯，佢話鵝肝無得拼，咁我唯有放棄，只係叫咗鵝腸拼滷水鵝飯。少爺叫咗沙薑雞飯。每碟飯都有跟潮州鹹酸菜，同埋滷水豆腐墊底。望落去份量有啲小，我問大少好唔好食，佢只係話份量比較少。我估佢呢一餐都係食唔飽㗎啦。我碟滷水鵝拼鵝腸飯，啲滷水鵝好多骨，冇乜肉，鵝腸就好乾淨但係漂都冇乜味。唔怪得知大少提醒我，叫我唔好對佢哋有期望。我只可以講價錢街坊價，當普普通通食一餐頹飯。