九頭鳥米線

營業中

休息中

九頭鳥米線突然一年內冒出黎係港島開左3間分店，近排仲進駐九龍開多間，個個都好神奇咁問到底發生了什麼事? 加上唔少人食過九頭鳥後話似足譚仔翻版，有一日係中環開完會，咁岩一丁人，就去試下呢間神奇「連鎖」米線店。店舖裝潢或許用木系為主題，感覺上都有點簡約風，如果唔計隔板的突兀之感，其實你話去Café都似。講番食物，餸料選擇方面其實都幾多選擇，包括有魚肉春卷、墨魚頭、豬肚、豬軟骨等。米線上枱後份量都唔錯，魚肉春卷都幾大件，仲要有3件，而食落去同平時食開唔同，表面係脆皮，好唔好食就見人見智，唔好食就會覺得比較乾，但我就覺得幾特別，食落去有脆皮口感。另外都叫埋雞肉，雞肉正常發揮，至少唔會有雪味，但調味就略嫌輕手左。米線都爽彈，唔會過淋，而湯底就真係幾似譚仔，但相對濃郁些少。整體黎講，九頭鳥係譚仔同南記的結合體，比譚仔濃郁的湯底配上有南記「脆皮」的魚肉春卷，如果揀連鎖的話，三間黎講如果保持水準，我暫時會揀九頭鳥。