Are U Labeler

營業中

休息中

展開聖誕假嘅第一樣嘢當然係瞓到自然醒，然後懶洋洋咁食返個bunch，上網搵到呢間喺旺角嘅cafe，俾佢嘅店名同立體拉花吸引到。一入門口就見到好多聖誕裝飾，但最吸引我眼球嘅係用嚟寫menu嘅黑色石牆，畫滿好多唔同嘅卡通，好有特色。吧枱亦放滿飾物，影相一流。食物選擇唔算多，但基本嘅意大利粉、意大利飯、All Day Breakfast同雞翼薯條等等嘅小食都一應俱全。本來係為咗立體拉花而嚟，但店員話已經暫停咗一排，只有普通拉花，所以我哋叫咗兩杯梳打。荔枝梳打面頭有玫瑰花瓣，用雙層玻璃杯裝住，賣相別致。佢嘅荔枝味偏淡，唔會話好甜，飲落好清新，浸住嘅荔枝肉就好甜，好有對比，唔錯。檸檬薄荷梳打比荔枝梳打更清爽，甜度適中，好清新解膩。All Day Breakfast好豐富，滑蛋炒得好香，蕃茄同大菇亦焗得剛剛好，牛角包帶微甜，如果熱啲就更完美，食完成碟覺得好滿足。松露薯條已經夠邪惡，仲要加埋芝士同香草，薯條炸得夠香脆，而且份量都幾多，芝士就可以再多啲。Cafe寫意嘅空間令人覺得好放鬆，簡單樸實嘅bunch亦為悠閒嘅一日打開序幕，可以話係假日嘅優質選擇。