鳴越越式料理

營業中

休息中

今早因為要趕住做完個report畀老細，結果搞到三點鐘才可以出去食晏。 正考慮不知食乜好 ，突然醒起公司附近有間越南餐廳下午茶有折; 一於就去試下。餐廳要落地牢，店內以綠色為主調，掛上不少越南風景和特式美食的畫;地方算是闊落。下午茶價錢約四十至五十不等，另外再配小食和飲品添。 而呢度嘅小食都幾多選擇㗎。越式海鮮炒金邊粉 呢個炒金邊粉份量都幾大，有蝦、青口、帶子和少少雜菜，算是足料。但與我平時食慣啲有些小唔同， 就是冇左花生碎和蛋絲，所以冇咁香口。 不過咁嘅價錢又有咁多料都算合理。越式炸春卷春卷炸得香口皮脆，包著都是紅蘿蔔絲、肉碎、沙葛絲、粉絲等等;亦帶有胡椒粉調味。食時加埋甜酸醬和生菜一齊食，即時令口感清新 和不油膩。金桔青檸梳打 青檸一向是我至愛，所以餐飲當然要飲青檸梳打啦!估唔到佢嘅梳打水唔係用普通罐裝果種，是樽裝的而牌子亦不曾見過。 柑桔和青檸份量都很多，所以飲落非常開胃和消暑解渴。