吉列牛忌廉烏冬專門店 (百樂中心) (已結業)

落住微微雨，又寒風凜冽，最好食啲辣嘢暖吓身呀。中午時段上到嚟，都冇咩人，真係隨便坐都得呀。睇咗餐牌，先點幾個小食先。炸芝士薯仔年糕，芝士味唔覺有，年糕冇味，中間仲要凍嘅添。骨付豬肉腸，煎得幾香，醬汁都好好味，豬味又濃，但係好似仲有陣雪味咁。滋味單骨雞翼，雞翼上面啲粉有好多種，但我地就覺得太多添喇，而且都算辣，同埋食完會好口喝架。吉列牛定食咖哩忌廉烏東，二人前嘅定食，份量夠唔夠就見仁見智喇。先講牛，五成熟，因為切得太細件，吉列嘅味道感覺唔到。若果覺得唔夠熟，旁邊有塊鐵板，放上去加熱煮多陣都得。麵豉湯唔錯。咖哩忌廉烏東，咖哩味好香，食多幾啖仲覺得辣添，好在有忌廉去中和番。烏東圖身嘅，好掛汁同好彈，入面仲有啲菜、牛肉添。定食餐送汽水，我地轉咗特飲，唔錯丫。