紅米 (六合街)

營業中

休息中

週末探望要返工嘅朋友，特登嚟咗新蒲崗六合街，經朋友介紹下，嚟咗呢間紅米餐廳食下午茶。進入餐廳，感受到已經有啲歲月嘅痕跡，尚算清潔衛生，但絕談不上有靚裝招待。店員招呼親切，對客算有禮貌，眼見動作都相當爽快。過程都同大多餐廳一樣，係自助落單。食物方面性價比高 -鮮油西多士 $37 包熱飲: 同朋友share, 所以叫咗全份西多，如果想半份西多配炸髀，仲只係$41。西多厚實豐滿，有雙層花生醬，更覺香口，火喉炸得恰好 👍🏻懷舊飛碟 $28 包熱飲: 麵包烤焗得夠香夠脆，內裡包住濃厚沙嗲軟嫰牛肉，唔會過鹹或過甜。份量相對輕怡，啱晒茶餐時間唔想食太多又過過茶癮嘅街坊。熱奶茶: 正常發揮茶餐廳貨色，茶味夠，奶比例足，但談不上特別出色。橘子香濃咖啡 (跟餐轉飲$12): 見到廣告圖就被深深吸引，始終唔係周圍有得飲，當然要試試。先試橙汁底有果肉，略為偏甜 ; 咖啡係特濃級數，屬即磨貨色。攪勻兩者飲用，橙汁成為飲品甜度唯一來源，即時變得甜度恰好，比例上橙味、啡味平衡，有驚喜 😍總括而言，此店下午茶價錢絕對對得住質素，難怪朋友高度推介。