巴黎小館

營業中

休息中

假日閒遊中環，總愛到大館逛逛藝術展覽，感受一份文化氣息。行到攰一攰，無意中俾一間餐廳嘅露天座位吸引住，心諗，不如chill chill咁食個Brunch，好好慰勞自己。餐廳提供多款Brunch套餐，可以喺croissant或者朱古力包之間二揀一，仲包一杯飲品。我試咗佢哋嘅croissant，質感令人驚喜，外層酥脆，內裡紮實有層次，配埋杯香濃咖啡，絕對係一個完美嘅開始。主菜我揀咗All Day Breakfast。德國香腸肉香四溢，肉汁豐富，煙肉煎得剛剛好，微脆得嚟唔會太乾，夾啲滑嫩炒蛋一齊食，口感升級。蕃茄同蘑菇新鮮多汁，而hash brown就更加出色，外脆內軟，一啖接一啖，停唔到口。整體表現無可挑剔。朋友點咗Egg Benedict，底層用上煙煙韌韌嘅酸種麵包，加上一片鹹香火腿，頂層放個流心水煮蛋，這個組合，真係冇得輸。餐廳主廚用料講究，每道菜都感受到佢哋嘅用心。環境設計歐陸風格，露天座位開揚舒服，坐低就唔捨得走。無論係味蕾定心情，呢度都係週末放鬆嘅完美落腳點。