夢 (已結業)

老蘭舞場週二重開，XO仔就孖舞伴早啲喺附近新開嘅「夢」撐枱腳。樓上餐廳由門面個金漆招牌到室內設計及餐具擺設都清一色咁金光閃閃。用餐大堂開揚通爽，右方為二至多人合併式散座，配上黑色嘅厚墊皮櫈，既新潮又舒適。左半邊則有個開放式廚房，面前有一排吧位，食客可邊飲、邊食、邊睇住師傅們烹調食物。兩口子被安排入座大舞台前方嘅靚位，席上金碧輝煌嘅餐具、餐墊、餐巾極具氣派。埋位即有熱茶及熱毛巾，毛巾同其他餐具上都印有店名個「夢」字，製作相當全面。Wilson師傅作出簡介時真係好謙卑，首先道出小店開業只有一個月，各方面仍在改進中，希望大家多多包涵。餐牌上嘅三個選擇其實差不多每一日都會略作調整，由於材料大多來自日本，建議初訪嘅食客可先嚐$1,380/位嘅「七月季節懷石」，節令食材都會以嶄新嘅面目上枱，包保大家會有驚喜。為晚餐作序嘅「先付」以木造托盤呈上，盤上舖有粉紅色嘅櫻花花瓣裝飾，雅麗精美。透明小杯內以味清嘅粟米湯作底，湯內嘅大小圓粒全為雜果分子波波，當中嘅雜果有提子味、柿味及蜜瓜味，煙煙韌韌都幾得意。接棒嘅「八寸」其實係前菜拼盤，啡啡黃黃嘅枯葉擺盤散發出濃厚嘅秋季味，非常符合碟上六款節令小點，建議由左上