手機、玩具乜都買過🤖，今次不如帶埋細妹，齊齊食好啲。
佢話成日想試吓TST間鮨舞，我話OK吖👌🏻，最緊要妳鍾意。
一試，發覺妹豬同我，原來一樣咁有眼光😎✨
兵庫縣津田宇蠔🦪配酸汁
鮨舞師傅專登保留返啲原生蠔汁，所以食落特別夠味！蠔肉鮮甜同天然海水鹽味完美混和，一齊喺味蕾上散發升華，加埋冰涼開胃嘅檸檬刨冰，食完到而家仍然非常回味。
中拖羅🐟刺身
未上碟，妹豬已經細細聲話好Pink！我見到脂肪同啲肉紅白相間，油花白裡透紅咁，就知一定好食。咬落果然非常甘香柔軟，而且入口即化，成件魚腩都滲透出濃厚嘅鮮甜味。
車海老🍤二味壽司
一次過歎到兩種風味嘅車海老=花竹蝦！先將蝦膏搽喺表面，再用火輕輕炙燒，最後加上烏魚子粉或蝦油，配合份量啱啱好嘅醋飯，惹味得嚟唔會過鹹，係一道有花過心思嘅Omakase絕品。
輕燒🔥青柳貝壽司
肉質爽脆，淡雅得嚟夠清甜，輕輕燒過之後嘅微焦，大大引出貝肉獨有嘅海洋風味。妹豬扮專家，話青柳肉質寧舍嬌嫩，所以火候要控制得宜，否則會加熱過度而影響口感，因此鮨舞師傅手藝真心高超！
箱押松葉蟹肉🦀青瓜
我哋全家都係蟹痴，所以對呢一道菜印象特別深刻，同有驚喜！原條松葉蟹棒打孖上，連埋上面嘅蛋黃醬一齊食，蟹味濃烈到好似喺口度爆開咁！妹豬仲醒，第一啖，就識得連埋下面嘅青瓜碎放入口，撞出更有層次嘅海鮮鹹香。
提拉米蘇配🍓士多啤梨
今次個Omakase，每道菜都好出色，最估唔到壓軸呢個意式甜品，都係呢間日本料理嘅自家製品，勁！提拉米蘇奶、酒、咖啡芳香渾然天成，入口柔軟嫩滑；而嗒落甘甘哋嘅可可粉，同嚟自香川縣嘅超甜士多啤梨好夾。妹豬自己食完，仲想猴埋我嗰份……哼哼哼，真天真！
下次投資再有斬獲，會再帶佢過嚟開餐嘅，不過到時先講啦😜~
