西貢越南真味 (已結業)

兩個人夜晚係油麻地好肚餓，突然之間好想食越南嘢，行行下俾我哋見到依一間，就決定入去試吓。睇完餐牌都見到有好多選擇，見到火車頭河粉就好想試吓！知道佢都幾大碗，所以決定兩個人食一個。火車頭牛肉鍋粉，真係好足料！入邊有生牛肉，牛肉，牛丸，牛柏葉，牛肚，牛筋，仲有蘿蔔，之後個湯好濃，飲得出係熬咗好耐先可以有嘅味道 ！再加埋河粉份量都唔少，兩個人share黎食真係啱啱好！鮮蝦海卷，依個卷真係要讚一讚！有生菜有炸蒜頭令到佢好有咬口，跟住又有扎肉又有蝦，又有粉絲又有蘿蔔絲，成件事真係好正，每一舊都好大舊，食落口好滿足。烚生菜，成晚冇乜點食過菜所以都叫咗個生菜黎食下，唔要蠔油，幾Fresh，可以中和返火車頭嘅濃味。椰青，飲落都幾清甜，食咗碗火車頭之後飲一啖真係好舒服，飲完仲可以刮啲椰肉黎食真係唔錯。