金輝海鮮菜館

營業中

休息中

昨天入西貢食海鮮，平時十次九次都係幫襯全記，因為好味，其他通記，洪記都試過！今次朋友話想試其他海鮮菜館，一入到西貢就有大大個招牌擺喺入口，金輝海鮮菜館，基本上我唔想試呢間，因為門面睇落去都唔係咁好，有兩個舖位但面積好細，喺門口已經有職員叫我哋入去另一邊坐，話冷氣好大，又話送汽水又話送湯又話送菜，我朋友好想試呢間咁就入去！一坐落鬼死咁熱，又無門又無膠簾，冷氣都走晒！叫咗＄400幾元嘅套餐，好快就上菜啊，都唔知係咪一早煮定，個湯係送嘅，但係好難飲蕃茄薯仔煲蝦，好鬼鹹唔似湯好似水！第一個餸就係西芹炒帶子，啲西芹好硬，硬到咬唔開，帶子細粒都似蝦米，亦都係好硬，成個餸食唔到！龍蝦伊麵，龍蝦冇龍蝦味，好似咬落一舊粉咁，落咗太多芝士！豉油皇蝦，啲蝦完全唔新鮮，只食到好重味精！海蔘冬菇炒菜，海蔘切到一粒粒，一啲都唔似海蔘，應該係啲好平價嘅海蔘，啲北菇好酸，落咗好多油全部反晒光！另外一碟炒白菜，啲白菜有漂白水味，成碟無食！佢之前話送汽水，問佢嘅時候又話無得送要比錢，我哋叫咗一支，之後計數嘅時候又唔收汽水錢，佢明明話一人送一支，但結果無！呢間酒家好難食，以後唔會再嚟，不知所謂嘅菜館！