鳥海山鐵板燒 (已搬遷) 新店位置

今日同朋友嚟到鳥海山食個早dinner，門口裝修都好有日式嘅感覺，感覺上嘢食都唔會差！呢個鐘數果然冇乜人食嘢，但係咁樣坐得好舒服，開心。我同朋友就揀咗呢個鮑魚餐，非常豐富，會包咗是日精選刺身、沙律、鮑魚、鱈魚、大蝦、椰菜、炒飯仲有麵豉湯。其實我真係唔食刺身嘅，雖然比好多朋友都話過呢個野，但係我真係唔鍾意食生魚，朋友鼓勵我試一嚿，我咬咗幾啖都係接受唔到，所以就朋友全部食晒，佢話幾好味㗎。跟住就到我主場啦，係煎鱈魚，我勁鍾意食鱈魚，好好味呀，肉質滑嫩，外皮脆脆地。大蝦彈牙彈牙，大大隻。跟住到鮑魚，有浸唔知點形容嘅香味，肉質比較結實但都彈牙嘅。再嚟就係花椰菜，菜類嚟講我都幾鍾意食花椰菜。雖然睇落冇咩特別，但係我係成盤清晒㗎。最後就係以呢個炒飯作結，加入咗基本嘅蛋、蔥、櫻花蝦，粒粒分明，好食。