麻辣派對 (金百利廣場) (已結業)

今日同三五知己去咗銅鑼灣行街，大家忽發奇想就好想食水煮魚四川菜，企喺SOGO度抬頭望上去見到有間麻辣派對，於是我哋就一齊試試先。首先嗌咗個頭盤就係麻辣牛𦟌，牛𦟌炆得非常之入味，而且個辣味好香，配埋花生碎簡直真係好醒胃。跟住就係嗌咗個酸菜江團魚，魚肉非常之滑溜，又無骨，可以好放心咁大啖食，而且份量好多，個湯亦都非常之醒胃，最重要係個酸菜亦都好好食，食完亦都唔會有頸渴嘅感覺。另外嗌多個小食就係雞脆骨，其實係大粒嘅雞軟骨，雞脆骨炸得非常之香脆，而且加埋上面啲蒜同秘製辣粉真係冇得頂。最後不得不提，全場大家都好似飲緊凍檸茶咁，所以我哋都唔執輸帶返杯，份量唔止大杯，仲要茶膽沖得恰到好處，係一間可以回頭嘅餐廳。