發記腸粉粥品

營業中

休息中

天氣好翳熱，一個人係新元朗中心買完嘢，本來諗住去食燒鵝飯，但諗到未去過發記食粥，一支公可以當先頭部隊試吓，再介紹俾朋友。七點去到已經好多人，有冷氣嘅室內位已經滿晒，無所謂啦，反正食完都即刻返天水圍，就算天口好熱，都坐咗係馬路邊。叫咗皮旦滑牛粥及蝦米腸。皮旦滑牛粥用煲仔上，好大兜。粥底唔錯，好滑，夠味；牛肉份量好足，似乎有醃過，亦好入味，且好滑；皮旦唔腥，亦好足料。整體印象幾好。蝦米腸亦好大碟，耐過Ｄ粥上，相信係即蒸。腸粉滑，蝦米碎及葱花好足，啖啖都有口感，好多豉油，但相當甜，鍾唔鍾意則見仁見智。真係好多街坊幫襯，亦真係好抵食，我一個大肥漢食唔晒兩樣嘢。不過出面街邊真係超熱，下次帶定毛巾仔抹汗，皆因更多紙巾都冇用，Ｄ汗係咁滴入煲粥處，好尷尬。