寶泰船麵 (已結業)

雖然幾個月前先喺泰國返嚟，但係真係好掛住泰國嘅嘢食，特別係咁熱嘅夏天，好適合食又酸又辣嘅嘢。泰國船麵就啱晒啦，旺角最近新開咗呢間寶泰船麵，聽到好多人都介紹過，咁就一於嚟試吓啦。呢度有好多唔同款嘅船面，而我就揀咗呢個牛魔王船麵。因為佢有晒所有牛腩牛丸牛筋等等，非常足料。呢個船麵嘅湯底非常濃郁，不過因為我鍾意食辣，所以我都加咗好多佢哋嘅醬汁。佢嘅醬料非常有地道嘅泰國風味，真係好似去咗泰國一樣。而且佢嘅牛肉非常嫩滑，食落好有牛味，感覺係高質嘅新鮮牛肉。而我朋友就叫咗咖喱雞湯麵，佢話辣度啱啱好，而且都好有泰國嘅風味。而且呢度嘅份量好足夠，平時泰國嘅船麵經常都係細細碗，好難先食得飽。呢度一碗就夠泰國嘅三碗啦，店主完全唔孤寒，比好豐富嘅食材同埋面。朋友話佢嘅雞都非常嫩滑，而且份量好多。呢間餐廳又平又抵食，趁冇時間去泰國，非常推薦大家嚟試吓。