上海小籠皇

營業中

休息中

今日相約家人食下午茶，行經屋企附近商場，見到呢間鋪有下午茶食。之前有食過呢間鋪嘅晚市，都覺得幾正路， 估唔到佢有做下午茶， 所以決定一試。鋪面唔大， 算係乾淨企理， 樓底高有空間感， 光線也充足。下午茶非常經濟， 一個主食配一個配菜再加杯嘢飲， 都係賣40幾蚊，非常底食。我叫咗個四川擔擔拉麵， 配個鍋貼同埋一杯豆漿。 鍋貼一出場簡直係驚為天人， 真係有啲接近喺上海當地食嘅味道，肉汁豐富，皮脆肉嫩， 食落仲有 鮮甜嘅味道， 其他嗰啲乜嘢大王完全係冇得同佢比。 家人就叫咗個烤麩， 口感同味道就麻麻地啦。 擔擔麵湯底唔算濃郁， 不過都幾足料， 最重要係好大碗， 食完碗麵之後我諗晚餐都可以慳番。 最後嘅飲品，我叫咗杯桂圓雪梨茶， 味道好清香， 少少甜， 係清新嘅感覺。總括而言，呢間嘅下午茶cp值都幾高， 唯一可惜嘅就係要滿200蚊先可以簽卡。