吉列牛忌廉烏冬專門店 (彌敦道) (已結業)

餐廳座位唔算好多，裝修主要係以木、黑同白色為主，舒適。好彩來得早，走嘅時候已經接近滿座。美式頂級牛里脊套餐大啡菇配上芝士一齊烤，好香，軟軟的，好有菇味，可與洋蔥一齊進食。牛里脊店員提醒只有一成熟，需放上已經預先熱好嘅鐵板再燒一燒，燒嘅時候牛肉香氣撲鼻而來。牛肉食落好鬆軟軟腍，牛味亦好濃郁，冇多餘嘅肥肉，而肉汁非常豐富。咸蛋薯條上枱時熱辣辣，食落夠鬆脆，同埋有好香嘅薯仔味同咸蛋黃味，配上黑松露沙律醬，正！不過就有點邪惡感，哈哈！咖哩忌廉牛肉烏冬一層軟滑嘅忌廉係面，裏面其實就係煙韌彈牙嘅烏冬，份量不少。烏冬配以香濃咖哩，其實忌廉同咖喱味都幾夾，而忌廉甜度唔高。牛肉、西蘭花同蘑菇等配料，已好入味，尤其牛肉，而且係唔韌，忌廉可以令烏冬更嫩滑易入口，口感同味道確實吸引。