韓珍 (帝國中心) (已結業)

此店韓國人主理味道正宗，地方幾大卡位多，自成一國八人圍爐都適合，可說是好友歡聚食韓燒的不二之選。場內抽氣幾好店內無味，想韓燒的話有燒肉和海鮮套餐選擇，唔燒都仲有多款韓式料理，如醬油蟹、炸醬麵、炸雞、石鍋飯等等，價值ＯＫ的多人食比較化算。前菜 $0點完野食無耐八小碟就列陣出場，有生菜、辣筍、脆皮腸、大蒜和韓國辣椒、醃蘿蔔、泡菜、韓式炒翠玉瓜、千島醬沙律，韓式特色前菜酸辣開胃，而且仲無限任添。蛋薄餅 $0熱烘烘的鐵板煎蛋好厚身，面層有拉絲芝士的，仲有三色椒粒蔥粒，味道唔錯。海鮮煎餅 $150煎餅外型似足pizza，預先分成六件，粉底唔厚餡料唔少，有魷魚粒、帶子粒、蝦粒、紅椒和葱段，咸香的海鮮加上爽口的葱段再蘸埋魚露，口感味道豐富非常美味。海鮮拼盤 $350豐富海鮮有芝士扇貝、蜆、青口、魷魚、海蝦、鮑魚，樣樣新鮮乾淨。扇貝芝士碎好多有點邪惡，貝肉已預先起左，一夾就食得好方便。海蝦鮑魚好新鮮彈牙，細蜆十多隻好易燒乾，味道鮮甜。大魷魚切成細份包生菜加埋三醬中的韓式辣醬，酸辣美味好好食。西柚梳打 $48好喜歡西柚的清香，顏色又美，酸酸甜甜清爽解膩，配韓燒絕佳的開胃飲品。