Sweet 19

營業中

休息中

夜晚九點去到大概得一半入座率，點左兩個是日晚餐，海鮮盤同牛肋骨條，餐湯一紅一白，兩個都係普通貨色，海鮮盤有一隻蝦，一隻蠔，一塊魚柳，蠔唔新鮮，蝦仲未煎熟透，蝦頭部份仲係透明，魚柳較為正常，正常到係普通一塊雪藏貨略略煎過，反而伴碟薯餅有 D 驚喜，薯蓉加切粒薯仔，煎得香口又好味；牛肋骨條肉質尚算柔軟，可惜味道欠奉，冇油香而且淡而無味，疑似鬆肉粉嘅後遺症，餐後甜品蛋糕亦無甚特別，雖然可以加錢轉其他款式蛋糕，但係已經冇晒信心試其他蛋糕。餐廳隔音差，雖然客人唔多亦頗嘈吵，想扮高級餐廳又唔用桌布，擺刀叉擺到 Punk Punk 聲，如果燈光再暗少少，加返支蠟燭相信會理想得多，唯一可讚係侍應生服務態度非常好，總括食物當然比茶餐廳好，可惜呢個價錢我預計食物質素應該要更高。