住家菜 (已搬遷) 新店位置

想嚟呢度食嘢好耐。差唔多自老銅謝斐道舊舖嗰時已想嚟，但每次去到無論舊定係利舞台新舖都係人山人海，冇耐性等咁耐...一知道响尖咀開咗第三間，就偕太座一遊...平均四五十大洋一碟冇味精添加小菜，實在係各位"無飯家庭"嘅恩物...鱆魚節瓜眉豆煲豬踭夠老火，的確冇乜落msg，喝得安心..招牌太嫲雞就大失所望。沙薑雞又唔係，豉油雞又唔似，四不像；雞又係雪藏貨。好後悔叫咗呢味，浪費個胃嘅quota..魚湯雜菜煲好清，蝦乾落得極重手，正...最精彩嘅係鹹魚蓉煎肉餅。顏色金黃，邊位煎得極脆，好香口；鹹魚味香之餘亦不過濃；size薄到好似thin crust pizza咁。跟太座講笑話第時外賣一碟番去屋企，睇波當snacks食，好過食薯片花生多多聲la ^_^...太太越食越過癮，仲話想叫多一兩碟餸。嘩...小弟實在已經捧住個肚，放過我la..