六合小廚 (已結業)

行完apple store肚餓搵野食，出門口轉右就有一棟大廈好多餐廳，咁啱手機就快無電，見呢間六合小廚係港式餐廳，可以黎個地道晚餐，最緊要係仲有插頭叉電，就決定上去。呢間野茶餐廳feel，但係食物除左普通茶記食物仲有大排檔小菜，竟然有避風塘炒蟹（呢度叫香辣蟹）！因為好肚餓，見到有二人餐就直接點啦費時煩。我地兩個人點左個無咁貴既2人餐（$668）。個餐有香辣蟹、欖菜肉碎四季豆、霸王雞、例湯、白飯、花生小食。等上菜期間望下其他menu，原來呢度都幾多野食，由早餐到午餐再到下午茶都有自己既餐牌，有碟頭飯，有車仔麵，有小食，都算包羅萬有。首先上菜係霸王雞。薑絲鋪得好靚，雞仲係髀位添，超嫩滑。之後有欖菜肉碎四季豆，好大碟，食咁多肉有蔬菜真係好重要！四季豆炒得夠入味，有咬口。最後主角黎到，超大隻既香辣蟹！呢炸蒜同埋辣椒鋪得好靚好掂，打卡一流！打完卡即刻唔顧儀態動手拆蟹。個蟹鉗有我三隻手指咁大隻，拆完直接擺入口一啖食，真係超滿足。蒜味同埋辣椒味對我來講啱啱好啊，好食到有啲軟啲既位我連殼都食埋，哈哈。今晚好開心，咁嘅價錢同埋質素絕對冇失望呀。