麻辣派對 (金百利廣場) (已結業)

朋友叫我去食酸菜魚好多次，今日終於去了銅鑼灣金百利麻辣派對 🥳呢度嘅裝修真係好似開party room咁，同個名好貼切，打卡都唔錯。打開餐牌，主打有重慶銅盤烤桂魚$338，見到隔離枱食緊都幾大盤，另外水煮系列$198-$318，首先就要揀味道，有四款，除咗我最想食嘅酸菜味型之外，仲有蕃茄味型，呢款又真係未見過，夠晒特別，喜歡食辣嘅當然就係鮮椒味型，水煮味型，辣度有唔同嘅程度可以選擇，我就叫咗BB辣，酸菜魚都係有少少辣先好食😋之後就係要揀魚，平時多數食桂花魚嘅，不過見到有一款叫剝皮魚，當我哋喺度研究乜嘢叫剝皮魚嘅時候，侍應都好熱情，佢即刻介紹剝皮魚就係冇骨嘅，咁就最啱我啦😂雖然個名叫麻辣派對，但係其實都可以叫唔辣嘅。叫左酸菜魚，當然要加其他配菜，都有幾十款選擇，貴有花膠小龍蝦🦞，平有豆腐娃娃菜，就連田雞都有得食。特飲都有幾款，我哋就叫咗冰蜜語水果茶，食辣嘢點都要有一杯凍嘢飲下嘅，杯水果茶好大杯，甜甜地正好可以解辣。