皇朝明珠

營業中

休息中

週末約咗幾個朋友去大埔飲茶，有人提議入三門仔嗰間皇朝明珠食，話嗰度啲嘢食好味之餘，周圍環境都好靚，又有得泊車，一於去試吓。👏去到嗰度，環境靚到不得了，有山有水，室內裝修高雅，又可以坐外面欣賞靚靚嘅境色，朋友話怕熱又怕蚊，所以都係坐喺室內。😅呢度啲茶葉質素好高，唔同普通嘅茶樓，茶味香濃。食物方面都幾多選擇，有幾樣點心係經理特別推介，我哋叫咗嗰啲點心之餘亦叫咗其他我哋鍾意食嘅嘢。😄等咗一陣，點心陸續出籠。先嚟個燒乳豬，上枱時仲係熱熱哋，皮脆肉嫩，正！跟住嗰幾個都係經理推介嘅，上湯金魚餃配水晶球，好似條金魚喺水入面游緊水，餃入面都係新鮮嘅蝦，湯係用金華火腿熬出嚟，好香濃，水晶球嘅料都係用鮮蝦做，一個字，鮮！😋飲茶又點可以冇蝦餃燒賣呢？佢哋用嘅料都係唔差嘅，相信係師傅每日新鮮手做，唔似有啲茶樓由中央工場派送嘅。佢哋腸粉有樣好特別嘅就係三色腸，一碟有三款包括鮮蝦、义燒同牛肉，滿足唔同人嘅需要。👍另外叫咗义燒酥、麻辣小雲吞、蟹肉芙蓉餃、手打百花餅同牛油果鮮蝦春卷，冇一樣係會令你失望。再嚟個燉螺頭湯，用料十足，清甜冇味精，個個飲完都讚不絕口。最後食埋個流沙包做甜品，呢餐真係冇得頂。👍👍