睿居酒屋 (已結業)

我就本身好少去港島區搵食嘅，不過因為最近工作嘅關係好多時都係港島區嗰度收工。大坑呢個名對我嚟講真係好陌生，印像中我係好似嚟過一兩次咁樣，難得去開呢邊，同事就介紹咗大坑有間居酒屋都幾出名同好食既。一去到真係有驚喜喎。講咗食物先，我哋今日叫咗都唔少嘅嘢食，有串燒，燒物，刺身同壽司等等。前菜，鱈魚乾脆脆地，配沙律醬，原來都幾夾。實在係豐富嘅一餐，感覺就好似廚師發板咁。我覺得廚師係即叫即整嘅，因為我食落嘅刺身，壽司或者係燒物串燒都係好新鮮，刺身就好鮮甜，燒物同串燒就好熱辣辣同香口，味道唔太濃，唔太淡，剛剛好。而且餐廳叫座位都坐得好舒服，前庭門口有石春路，庭院自然的感覺，門面都幾有心思。同日本嘅居酒屋感覺一樣，真係幾啱同朋友收工之後，喺度食住串燒壽司刺身同埋飲住啤酒，傾下偈，放鬆下平時工作嘅壓力。