老川皇

營業中

休息中

要搵一個同樣喜歡食辣嘢嘅人其實唔容易。是日就覓得同樣嗜辣的可人兒共赴老川皇，一齊食辣嘢。講返老川皇，其實我唔係第一次食。不過平時幫襯開油麻地分店，食佐敦呢間都係第一次，但為左一陣去電影中心睇戲，就一於試吓去吳松街分店！我地大概2點去到，舖頭仲有午市食客，要同人搭枱坐。天時暑熱，即刻嗌杯凍飲解解渴。我就叫左蜂蜜檸檬柚子茶，朋友就要檸蜜。為左健康起見，我地都嗌左少冰。講真，出開街食飯既朋友都會明，嗌親少冰嘅飲品，其實次次上枱時咪又係鬼死咁多冰，所以我落單時都無乜期望。點知，呢間野又俾到驚喜我喎。好明顯地少左係「少冰」呀！嗱，所謂見微知著，一杯普通凍飲就睇得出呢間嘢嘅姨姨夠細心！我地望左望餐牌，即刻瞄準目標，向水煮魚出發！既然要食，梗係要食靚野。所以我地叫左半份小辣嘅水煮桂花魚，再叫左碗重慶酸辣粉share。朋友咁岩想食青瓜，咁我哋又再叫多份小辣嘅手拍青瓜。落完單，附近有客走，有枱空左，我地就心思思想轉枱，費時同人搭枱啦。點知都未出聲，姨姨就主動行埋嚟問，我哋梗係即刻話好啦。轉完枱冇耐之後，就開始上菜啦。手帕青瓜超大份，粗略估計有三條青瓜。可能因為叫咗小辣，食落都唔係幾辣，下次可以挑戰中辣。