湊湊火鍋‧茶憩 (希慎廣場)

營業中

休息中

今日同三個朋友去食set lunch，唔平4個set lunch +4杯嘢飲加埋一個酥排骨小食平均每人140（包埋服務費），叫咗一個XO醬撈麵、兩個排骨飯、同一個眷村牛肉麵，都係啲平常台式餐廳穩陣冇死嘅嘢。但呢間嘢好嘢，牛肉麵個湯底睇落去好濃但係飲落去同水冇分別，啲牛肉勁韌鞋底咁款，至於嗰兩個排骨飯啲排骨好似用殭屍肉咁，一樣都係冇肉味同埋紅卜卜，問過店員點解啲豬肉煮熟咗之後都係咁紅，佢就答：「係豬肉煮熟咗都係紅色㗎啦」真係無咗言⋯至於個XO醬面一樣都係成碟嘢冇味，都唔知間嘢點樣整。跟住係套餐嘅配菜，豬紅食落去都係完全冇味口感好似發泡膠咁，滷水豆腐同蛋都係完全冇滷水味，唯一就係送碟粟米同菜係正常諗住叫珍珠奶茶飲，分別嚟咗四次唔同店員，每次都要重複確認一次單，去到最後竟然都係可以落錯，四杯珍珠奶茶有三杯分開來都係冇落到珍珠，最後有個類似職位高啲嘅人過嚟再確認多次，明明係佢哋落錯仲好似好唔耐煩咁。簡單來講，完全係劣食，服務質素差啲員工好似懵懵吓咁，八方雲集都正常過呢間嘢。