GOGO 為食坊

營業中

休息中

今日同同事食lunch，兜咗個圈都唔知食乜好，外面又熱到死，見附近有間Go Go為食坊，又見末試過就入去試下啦！嘩！冷氣好充足😍，搭扶手電梯上咗一層，空間又大坐位又多，感覺零舍舒服。午餐只需$60.-又幾啱心水，於是點咗兩個試下。餐湯眉豆赤小豆冬瓜煲豬肉，味道濃有肉香味，個湯估唔到幾好飲。粟米斑塊，斑塊外層炸漿薄身，炸得香脆，斑塊濕潤嫩滑，粟米汁味道調得好，混埋斑塊一齊食好好食。另跟一碗飯，飯質軟熟有飯味。星洲炒貴刁份量多，材料豐富有蝦仁、火腿絲、洋蔥、蛋絲、韭黃、蔥花、青紅椒絲等。蝦仁幾大隻而且爽身彈牙，貴刁滑溜唔易斷，咖哩及黃薑味香濃，帶微微嘅辣味，好食。餐飲兩杯熱咖啡，咖啡味濃又幼滑，唔錯。