蘇媽.蘇媽馬來西亞茶餐室 (已結業)

以前蘇媽蘇媽淨係得深水埗有嘅時候已經成日幫襯，近年見佢越開越多，真係好開心。檳城亞參叻沙米線 $62一定要問店員拎蝦膏醬，因為加咗蝦膏醬嘅湯底更加鮮甜。亞參叻沙個湯底加入左羅望子同亞參果，令到酸味更突出，同埋用魚蓉同菠蘿代替常見嘅魚片魚蛋，所以同一般喇沙嘅味道好唔同。鍾意食酸嘢開胃嘅朋友可以試吓，呢個味道唔係度度有㗎！檳城白咖喱麵 $62奶白色嘅湯底旁邊有一匙羹嘅特色參巴醬，攪勻之後令白咖喱湯底更惹味，難怪餐牌要寫明唔建議走辣。配料方面有豆角、豬紅、魚蛋、蝦仁、雞蛋同芽菜，相當豐富。海南鴛鴦燒麵包 $45烘到脆卜卜嘅焦糖味麵包夾住厚切牛油同香甜嘅咖吔醬，真係超邪惡超好味！馬來咖喱酥 $52一客有四件，可口鬆脆嘅酥皮包住咖喱味嘅薯蓉同絞碎嘅雞肉，外型似餃子，味道同口感似samosa。檸檬薏米水 $28（跟餐價）每次去蘇媽我都一定會飲，因為啲薏米好好食，口感煙韌，越咬越甜，而且檸檬薏米水有祛濕、消腫、排毒以及美白嘅功效，越飲越靚！冬瓜龍眼冰 $28（跟餐價）真材實料之作，除咗龍眼肉，仲有一條條甜甜哋嘅冬瓜條，天氣咁熱，好消暑。