Briketenia (已改名) 查看

今日難得同粒薑糖好友聚一聚，又剛巧北角工作，揀咗間法國菜試試，店子唔算大，勝在有海景，窗口位望住東廊，見到有情侶撐枱腳，靜靜地環境唔錯。侍應安排咗張角落位，兩個人鬆鬆動動傾下計（但可坐4個人嘅L型長梳化），甫坐低好有禮貌問我哋有咩想食，一睇餐牌樣樣都想叫，之後侍應推介牛扒同埋廚師推介隱藏MENU- 法式油封鴨，一聽即刻去馬！先來個PARMA HAM伴哈蜜瓜醒醒神，再來自家製銀魚柳醬配熱烘烘麵包，第一次食銀魚柳醬，好味又比牛油多份魚香咪，正！之後周打蜆湯，好耐無見過唔係杰撻撻，真有海鮮味嘅湯，原隻蜆肉加點蕃茄粒又幾有趣，轉頭前菜係燒牛肉配塔布勒沙律，沙律係中東式做法，有小米香芹又有檸檬汁配搭，清新而不膩，燒牛柳肉嫩。。。。到呢PART已經好滿足，不過當主菜出現時，立即變得肚餓！法式油封鴨係法國菜重要菜式，都係第一次食，外表望落有點乾身，但一切開再放埋入口，嘩！鴨肉依然嫩口柔軟，一啲都唔乾，鴨香配黑松露薯蓉，絕對美味！另一道牛扒同樣處理得恰當，兩種食材都滿滿純味，廚師功力深厚！最後當然來一杯咖啡，捧住個肚滿足地離開，身邊粒薑糖都掛住食唔得閒分享應援日常，證明呢餐飯正啦！要推介比港島朋友先！